Մոր և մանկան առողջության պահպանման գիտահետազոտական կենտրոնում (Research Center of maternal and child health protection)

շարունակվում է Առողջապահության համաշխարհային կազմակերպության (WHO) և ՄԱԿ-ի բնակչության հիմնադրամի (UNFPA) նախաձեռնությամբ կազմակերպված վերարտադրողական առողջության և անվտանգ մայրության թեմայով կոնֆերանսը: MEDINFORM-ի հետ հարցազրույցի ընթացքում կենտրոնի տնօրեն Գեորգի Օկոևը

 տեղեկացրեց, որ այս օրերին Հայաստան ժամանած տարբեր երկրների ներկայացուցիչները և ԱՀԿ մասնագետները քննարկվում են ստրատեգիական համագործակցության ծրագրեր: Դրա արդյունքում հետագայում ավելի օպտիմալ աշխատանք կտարվի սեռական ճանապարհով փոխանցվող հիվանդությունների և առողջ մայրության ուղղությամբ: Կոնֆերանսի ընթացքում, մասնակիցները բաժանվելով մի քանի խմբերի, քննարկում են, թե իրենց երկրներում ի՞նչ ծրագրեր են մշակվում և իրագործվում մասնավորապես սեռավարակների դեմ պայքարի ուղղությամբ: «Հուսով ենք, որ քննարկումների արդյունքում կկարողանանք «նոր խոսք ասել» առողջապահությանը»,- ընդգծեց պրն Օկոևը: Մեր հանրապետության գլխավոր մաշկավեներաբան Կարեն Բաբայանը նույնպես փաստում է, որ նման կոնֆերանսների անցկացումը օգտակար է մասնագետների միջև փորձի փոխանակման առումով: Կոնֆերանսի ընթացքում փորձ է արվում հասկանալ, թե ետխորհրդային երկրները սեռավարակների դեմ պայքարի որն փուլին են հասել: Այս տարվա կեսին հանրապետության մարզերում և մայրաքաղաքում կանցկացվի մոնիտորինգ, որի ընթացքում կպարզվի՝ ԱՀԿ առաջարկով մշակված սեռավարակների վարման ազգային ուղեցույցն ունեցել է իր դրական ազդեցությունը, թե՝ ոչ: Կարեն Բաբայանի խոսքերով՝ ուղեցույցով պետք է առաջնորդվեն հատկապես ընտանեկան բժիշկները, ովքեր հիվանդին, եթե ոչ խորացված, ապա սինդրոմային բուժում պետք է տան, ինչը համաշխահային փորձի համաձայն՝ տալիս է լավ արդյունք: Ղազախստանում ՄԱԿ-ի բնակչության հիմնադրամի ծրագրերի ասիստենտ Արմա Նիսինան նշում է, որ այս կոնֆերանսի ընթացքում պետությունները միմյանց հետ կիսում են ծագած դժվարությունները և օգնում միմյանց դուրս գալու այս կամ այն իրավիճակից: Նրա հավաստմամբ՝ տարածաշրջանի գրեթե բոլոր երկրներում էլ բարձր է սեռական ճանապարհով փոխանցվող հիվանդությունների և հղիության արհեստական ընդհատման ցուցանիշը, ինչի դեմ պետք է համախմբված պայքար ծավալել: Նման  հավաքների ընթացքում երկրները նաև հնարավորություն են ունենում շփվել Առողջապահության համաշխարհային կազմակերպության ներկայացուցիչների հետ և ներկայացնել իրենց առաջարկները:
MEDINFORM 21.04.2006

 

Մոր և մանկան առողջության պահպանման գիտահետազոտական կենտրոնում ապրիլի 19-21-ը Առողջապահության համաշխարհային կազմակերպության (WHO) և ՄԱԿ-ի բնակչության հիմնադրամի (UNFPA) նախաձեռնությամբ անցկացվում է վերարտադրողական առողջության և անվտանգ մայրության թեմայով կոնֆերանս,

որին մասնակցում  են ներկայացուցիչներ Տաջիկստանից, Ռումինիայից, Ուզբեկստանից, Կիրգիզիայից, Թուրքմենստանից, ԱՀԿ Եվրոպական գրասենյակից և այլ երկրներից: ԱՀԿ վերարտադրողական առողջության հարցերով տարածաշրջանային համակարգող Գունտա Լազդանեի խոսքերով՝ մեր տարածաշրջանում վերարտադրողական առողջության հետ կապված խնդիրները բազմաթիվ են, մասնավորապես մտահոգիչ է մայրական մահացության և հիվանդացության ցուցանիշը: Ընտանիքներում կինը ենթարկվում է բռնությունների, ինչի հետևանքով ձեռք է բերում մի շարք հիվանդություններ: Գունտա Լազդանեն առկա խնդիրներից առաձնացրեց դեռահասների վերարտադրողական առողջության հետ կապված բարդությունները, ինչպես նաև երիտասարդների շրջանում թմրանյութերի օգտագործումը, ինչի հետաևանքով տարեցտարի ՄԻԱՎ/ՁԻԱՀ-ով հիվանդների թիվն աճում է: Նրա խոսքերով՝ հիվանդությունները բազմաբնույթ են և ճիշտ չէ մեր տարածաշրջանի զարգացող երկրները համեմատել, ասենք, Մեծ Բրիտանիայի, Իսպանիայի և այլ զարգացած երկրների հետ: Այստեղ նշված հիվանդությունները կանխարգելելու համար պետբյուջեից հատկացվող ֆինանսական միջոցները կարելի է չնչին համարել: Արդեն երկար տարիներ է՝ ԱՀԿ-ն աշխատում է Հայաստանի հետ: «Վերարտադրողական առողջության ոլորտում ձեր երկրում հատկապես արդյունավետ աշխատանքներ են տարվում մայրական մահացության և հիվանդացության ցուցանիշների նվազեցման ուղղությամբ»,- փաստում է Գունտա Լազդանեն: Նրա խոսքերով՝ ինչպես ողջ տարածաշրջանում, այնպես էլ Հայաստանում, կանանց շրջանում մեծ տարածում է գտել արգանդի վզիկի քաղցկեղը: 21-րդ դարում կինը չպետք է մահանա այնպիսի հիվանդությունից, որը վաղ հայտնաբերելու դեպքում հնարավոր է բուժել: ԱՀԿ կազմում ընդգրկված 52 երկրներից միայն Ռումինիայում, Հայաստանում և Կենտրոնական Ասիայի 5 երկրներում է ակտիվ սպեցիֆիկ պայքար մղվում նշված հիվանդությունների դեմ: Նշված երկրներն իրենց առաջարկություններով դիմել են ԱՀԿ-ին: Գունտա Լազդանեի հավաստմամբ՝ մեր երկրում սեռական ճանապարհով փոխանցվող հիվանդությունների դեմ ակտիվ պայքար է մղվում: Կազմակերպիչները կարևորում են նշված կոնֆերանսի անցկացումը, որի ընթացքում պետք է քննարկվեն 2006թ.-ին տարածաշրջանի երկրներում նշված հիվանդությունների կանխարգելման ուղղությամբ իրականացվող ծրագրերը:
MEDINFORM 19.04.2006


2005թ.-ի մարտի 21-ին ԱՄՆ Միջազգային զարգացման գործակալության (USAID) և «Advansed Engineering Associate International»-ի միջև կնքվել է համաձայնագիր Մոր և մանկան առողջության պահպանման գիտահետազոտական կենտրոնի (Research Center of maternal and child health protection) լոկալ ջեռուցման համակարգի վերականգնման համար: Ըստ այդմ՝ USAID-ին էներգաարդյունավետության փորձարարական ծրագրի շրջանակներում իրականացրել է կենտրոնի ներքին ջեռուցման մոնտաժային աշխատանքները, կառուցվել է ամերիկյան «Լաարս» ֆիրմայի արտադրության 285 Կվտ հզորությամբ տաքացուցիչներով աշխատող կաթսայատուն: Ծրագրի իրականացման համար ֆինանսավորում է հատկացրել ԱՄՆ Միջազգային զարգացման գործակալությունը և ամերիկահայ բարերար Հերման Հինտիրյանը: Աշխատանքների որակը վերահսկվել է Հապետ Թորոսյանի կողմից: Ծրագիրն իրականացնող կողմերն արձանագրել են, որ կատարվել է որակյալ աշխատանք: Նոր կաթսայատան բացման պաշտոնական արարողությունը տեղի է ունեցել սույն թվականի փետրվարի 15-ին: Արարողությանը մասնակցել են Հայաստանում ԱՄՆ արտակարգ և լիազոր դեսպան Ջոն Էվանսը, Երևանի քաղաքապետ Երվանդ Զախարյանը, առողջապահության փոխնախարար Թաթուլ Հակոբյանը և այլ պաշտոնատար անձինք:
MEDINFORM 03.04.2006

 

Մոր և մանկան առողջության պահպանման գիտահետազոտական կենտրոն (Research Center of maternal and child health protection) փետրվարին ընդունվել է 360 հիվանդ:
Ծնարան ընդունվել է 122, հղիության ախտորոշման բաժանմունք՝ 49, օպերատիվ գինեկոլոգիայի բաժանմունք՝ 68 և կոնսերվատիվ գինեկոլոգիայի բաժանմունք՝ 121 հիվանդ:
Կատարվել է 46 վիրահատություն և 22 կեսարյան հատում:
MEDINFORM 13.03.2006


Մոր և մանկան առողջության պահպանման գիտահետազոտական կենտրոնում (Research Center of maternal and child health protection) սեպտեմբերի 23-24-ն անցկացվում է «Արտամարմնային բեղմնավորման ժամանակակից խնդիրները» թեմայով միջազգային գիտաժողով, որին մասնակցում են Ֆրանսիայից (Franse), Շվեդիայից (Sweden), ԱՄՆ-ից (USA) և Ռուսաստանից (Russia) ժամանած  ճանաչված մասնագետներ: Գիտաժողովի բացման արարողությանը ներկա էին նաև Հայաստանում Ֆրանսիայի արտակարգ և լիազոր դեսպան Անրի Կյունին և առողջապահության փոխնախարար Թաթուլ Հակոբյանը: Ֆրանսիայից ժամանած բժիշկները հանդես եկան արտամարմնային բեղմնավորմանը նվիրված զեկույցներով՝ («Անօվուլյացիայի և դիզօվուլյացիայի բուժում», «Օվուլյացիայի խթանում արտամարմնային բեղմնավորման ծրագրում և ծրագրից դուրս», «Արգանդափողերի հետազոտություն», «Վիրաբուժական միջամտության դերը մինչ արտամարմնային բեղմնավորումը» և այլն):
Հայաստանում արտամարմնային բեղմնավորման փորձեր առաջին անգամ իրականացվել են Մոր և մանկան առողջության պահպանման գիտահետազոտական կենտոնում 1990թ-ին: Սակայն, ինչպես նշեց կենտրոնի տնօրեն Գեորգի Օկոևը (Georgi Okoev), առաջին փորձերը ձախողվել են: Այնուհետև, 1994-ից կենտրոնի մասնագետները սկսել են համագործակցել Մարսելի Վերարտադրողականության ինստիտուտի բժիշկների հետ, ովքեր 1998-ին ժամանել են Հայաստան: Սակայն այդ ժամանակ նույնպես փորձերը ոչ մի արդյունք չեն տվել: Համառ աշխատանքների շնորհիվ ի վերջո 2003-ին հայ և ֆրանսիացի մասնագետները հասան արդյունքի՝ գրանցվեց հղիության 2 դեպք, իսկ 2004-ին արտամարմնային բեղմնավորման արդյունքում Վրաստանի քաղաքացի Կարինե Մայսուրադձեն ծնեց 3 երեխա:
Նույն թվականին հղիների թիվը կազմեց 7: Այժմ արտամարմնային բեղմնավորում իրականացվում է Մոր և մանկան առողջության պահպանման գիտահետազոտական կենտրոնում, Մանկաբարձության և գինեկոլոգիայի հանրապետական կենտրոնում և «Էրեբունի» ԲԿ-ում: Առողջապահության փոխնախարար Թաթուլ Հակոբյանը նշեց, որ արտամարմնային բեղմնավորման մեթոդը թույլ է տալիս նվազեցնել անպտղության ցուցանիշը: Միաժամանակ փոխնախարարը ցավով հայտնեց, որ այդ ցուցանիշը մեր երկրում դեռևս բարձր է՝ կանանց շրջանում առաջնային անպտղության ցուցանիշը կազմում է 3%, իսկ երկրորդայինը՝ 20%:
Հայաստանում Ֆրանսիայի արտակարգ և լիազոր դեսպան Անրի Կյունին իր հարգանքի տուրքը մատուցեց հայ և ֆրանսիացի մասնագետներին՝ ընդգծելով, որ ընտանիքների պահպանումը Հայաստանի համար գերակա խնդիր է: Հայաստանում արտամարմնային բեղմնավորման մեթոդի ներդրման մեջ իրենց ավանդն ունեցող ֆրանսիացի բժիշկներ Ռոժե Ռոլյեին (Roger Rouler), Ժան-Պիեռ Ֆրանկուեբալմին (Jan-Piere Franguebalm), Ժան Լուի Սպակին (Jan-Louis Spach) Մոր և մանկան առողջության պահպանման գիտահետազոտական կենտրոնի տնօրեն Գեորգի Օկոևը հատուկ շնորհակալագրեր հանձնեց:

photo album

MEDINFORM 23.09.2005


Մոր և մանկան առողջության պահպանման գիտահետազոտական կենտրոն (Research Center of maternal and child health protection) հուլիսին ընդունվել է 314 հիվանդ:
Առաջին մանկաբարձական բաժանմունք ընդունվել է 133 մարդ, որոնցից 5-ը սպասարկվել են պետպատվերի շրջանակներում:
Երկրորդ մանկաբարձական բաժանմունք ընդունվել է 12 մարդ, ովքեր սպասարկվել են պետպատվերով:
Բարձր ռիսկի հղիների բաժանմունք ընդունվել է 47 մարդ, ովքեր սպասարկվել են պետպատվերով:
Օպերատիվ գինեկոլոգիայի բաժանմունք ընդունված 83 հիվանդներից 36-ը սպասարկվել է պետպատվերի շրջանակներում:
Կոնսերվատիվ գինեկոլոգիայի բաժանմունք ընդունվել է 127 հիվանդ, որոնցից 39-ը բուժվել է պետպավերով:
MEDINFORM 10.08.2005


Որքանո՞վ է ճիշտ և ընդունելի տղամարդու ներկայությունը ծննդաբերության ժամանակ:

1. Հայաստանում կա՞ն արդյոք այնպիսի ծառայություններ, որոնք ապահովում են ծննդաբերությունը տնային պայմաններում:
2. Ինչպե՞ս եք վերաբերվում այն բանին, որ որոշ երկրներում ծննդաբերում են ջրում:

Վերոհիշյալ հարցերի շուրջ տեսակետներ արդեն հնչեցրել ենք:
Այս անգամ հարցերին պատասխանում է Մոր և մանկան առողջության պահպանման գիտահետազոտական կենտրոնի տնօրեն, մանկաբարձ-գինեկոլոգ Գեորգի Օկոևը:
1. «Ես միանգամայն կողմ եմ ամուսնու ներկայությանը ծննդաբերության ժամանակ: Չէ՞ որ երեխան ունի երկու ծնող և նրանք մի ընտանիք են, մի ամբողջություն: Բայց այս ամենը մեր ազգային ավանդույթից և մտածելակերպից շատ հեռու է: Իսկ ծննդաբերության ժամանակ հիասթափություններից խուսափելու համար անհրաժեշտ է, որ ամուսինը հոգեպես պատրաստ լինի ծննդաբերության գործընթացին»:
2. «Ինչ վերաբերում է տնային պայմաններում ծննդաբերությանը, ապա մենք դրան դեռ պատրաստ չենք: Մենք դեռ շատ այլ առաջնահերթ խնդիրներ ունենք, և պետք չէ ժամանակ կորցնել: Այդ մասին կարող են մտածել սոցիալապես և տնտեսապես զարգացած երկրները, ինչպիսիք են Նորվեգիան, Կանադան, Դանիան և այլն: Հայաստանում առկա պայմաններում այդ մասին մտածել անգամ չի կարելի»:
3. «Մոսկվայի Մոր և մանկան առողջության պահպանման կենտրոնում 1979թ. թեկնածուական դիսերտացիաների պաշտպանության ժամանակ առաջին անգամ բժիշկ Չերնյակովսկին բարձրացրեց ջրում ծնունդ ընդունելու խնդիրը: Նա պատմեց մի կնոջ մասին, որի ծննդաբերությունը օվկիանոսում տևել է երկու օր: Երեխան ծնվել է, բայց չի շնչել, իսկ մայրն էլ իր հերթին խնդիրներ է ունեցել:
Ամեն ինչ թվում է շատ պարզ, բայց շատ նրբություններ ու խնդիրներ կան այս հարցում: Հենց այդ օրվանից ես սկսեցի մտածել ջրում  ծննդաբերության մասին, և որոշակի քայլեր արվեցին այդ ուղղությամբ: Նույնիսկ սենյակ առանձնացվեց՝ լոգարան (վաննա) պատրաստելու համար: Բայց կան զուտ բժշկական խնդիրներ, որոնց շուրջ շտապ քայլեր ձեռնարկելը ոչ միայն դյուրին չէ, այլև ճիշտ չէ. պետք է ամեն ինչի մասին մանրակրկիտ մտածել: Բացի այդ, ջրում ծննդաբերությունն ապահովելու հետ մեկտեղ նաև անհրաժեշտ է աշխատանք տանել հայ կնոջ մտածելակերպը փոխելու հարցում»:
MEDINFORM 05.07.2005


2002թ. բժշկագենետիկական կոնսուլտացիայի ախտորոշման մեջ ներդրվել է մոլեկուլային բջջագենետիկական FISH (fluorenscence in situ hybridization) մեթոդը, որի կիրառումը թույլ է տվել կատարել բարդ քրոմոսոմային խաթարումների ուսումնասիրություն (միկրոդելեցիաներ, միկրոտրանսլոկացիաներ, ինվերսիադուպլիկացիաներ, քրոմոսոմային մոզաիցիզմի առանձին տեսակներ), որոնց ախտորոշումը դասական բջջագենետիկական մեթոդների հնարավորություններից դուրս է:
Մոր և մանկան առողջության պահպանման գիտահետազոտական կենտրոնում 1974թ. ձևավորվել էր բջջագենետիկական լաբորատորիա: Դրա հիման վրա 1986թ. ՀՀ առողջապահության նախարարության կողմից ստեղծվել է բժշկագենետիկական կոնսուլտացիա, որն առ այսօր գործում է: Կոնսուլտացիայի գործունեության սկզբից կատարվել է ավելի քան 4000 բջջագենետիկական հետազոտություն՝ տարբեր տեսակ ժառանգական հիվանդություններով տառապող հիվանդներին ցուցաբերելով մասնագիտացված բժշկական օգնություն:
ԵՊՀ-ի և Շվեյցարիայի Ցյուրիխի համալսարանի բժշկական գենետիկայի ինստիտուտի միջև առկա պայմանագրով ԵՊՀ-ի ասպիրանտ, այժմ արդեն կենսաբանական գիտությունների թեկնածու, ԵՊՀ-ի Գենետիկայի և բջջաբանության ամբիոնի կրտսեր գիտաշխատող Մարինե Մանվելյանը մեկնել էր Շվեյցարիա, որտեղ պետք է քրոմոսոմային խաթարումները հայտնաբերելու համար կիրառեր FISH մեթոդը: Նրա հավաստմամբ՝ գիտական շատ նրբություններ հայտնի դարձան իրեն, որոնք էլ հենց տեղ գտան իր դիսերտացիայում: FISH մեթոդի կիրառումից հետո Ցյուրիխի համալսարանի բժշկական գենետիկայի ինստիտուտի տնօրենը և այլ աշխատակիցներ եկել են Հայաստան՝ Մոր և մանկան առողջության պահպանման գիտահետազոտական կենտրոն՝ անձամբ ստուգելու այստեղ սույն մեթոդի կիրառման արդյունավետությունը և արդյունքների ճշգրտությունը, շփվել են հիվանդների հետ:
Այսպիսով, Հայաստանում իրագործվել է բջջագենետիկական  հնարավորությունների միջազգային ստանդարտը և քրոմոսոմային խաթարումների բարդ դեպքերում բջջագենետիկական ախտորոշման ճշգրտման նպատակով դասական մեթոդների կիրառումը համատեղվել է FISH մեթոդի կիրառման հետ: Մոլեկուլային-բջջագենետիկական հետազոտության նպատակով օգտագործվում են ինչպես կոմերցիոն ԴՆԹ-զոդեր (Vysis, USA, Cytocell Technologies, UK), այնպես էլ ԴՆԹ –ներ, որոնք պատրաստվում են Երևանի պետական համալսարանի Գենետիկայի և բջջաբանության ամբիոնում: Մոր և մանկան առողջության պահպանման գիտահետազոտական կենտրոնում FISH մեթոդի ներդրման գործում կարևորագույն է Շվեյցարիայի Ցյուրիխի համալսարանի բժշկական գենետիկայի ինստիտուտի դերը: Դասական բջջագենետիկայի և FISH մեթոդի կիրառման հիման վրա ախտորոշված մի շարք դեպքեր գիտական առումով արժանացել են մեծ ուշադրության և ընդգրկվել ECARUCA (European Cytogeneticists Association Register of Unbalanced Chromosome Aberrations) ծրագրի մեջ: Մոր և մանկան առողջության պահպանման գիտահետազոտական կենտրոնում FISH մեթոդի կիրառումը զգալիորեն բարձրացրել է բջջագենետիկական հետազոտության արդյունքների որակը և հավաստիությունը:
MEDINFORM 25.06.2005


Մոր և մանկան առողջության պահպանման գիտահետազոտական կենտրոնում մայիսի 14-ին վիրահատվել է 1կգ 500գ քաշով նորածնի բաց բոտալյան ծորանը: Նշենք, որ վիրահատությունը թվով 3-րդն է և Հայաստանի այլ բուժհիմնարկներում չի կատարվում: Առաջին անգամ նման վիրահատություն կատարվել է 2 տարի առաջ, երբ նույն կենտրոնում վիրահատվել է 920գ քաշով նորածին, իսկ 2-րդ անգամ վիրահատվել է 30 շաբաթական անհաս տղա երեխա: Բոտալյան ծորանը սրտից դուրս անոթ է, որը ներարգանդային կյանքում նպաստում է երեխայի սնուցմանը: Սական ծնվելուց հետո երեխաների մոտ այդ ծորանը շնչառական անբարարություն է առաջացնում: Վիրահատությունը կատարել են Նորք-Մարաշ ԲԿ-ից Մոր և մանկան առողջության պահպանման ԳՀ կենտրոն հրավիրված մասնագետները: Այժմ հետվիրահատական խնամքն իրականացվում է այնտեղ: Բժիշկները երեխայի առողջական վիճակը բավարար են գնահատում: Մոր և մանկան առողջության պահպանման ԳՀ կենտրոնի մանկական բաժանմունքի վարիչ Պավել Մազմանյանի հավաստմամբ՝ անհաս երեխաների մոտ այսօր բաց բոտալյան ծորանը հայտնաբերվում է 30-40% դեպքերում:
MEDINFORM 27.05.2005


2005թ-ի սեպտեմբերի 22-23-ը Մոր և մանկան առողջության պահպանման գիտահետազոտական կենտրոնում կկայանա կոնֆերանս՝ նվիրված արտամարմնային բեղմնավորման զարգացման խնդիրներին:
Կենտրոնի տնօրեն Գեորգի Օկոևը տեղեկացրեց, որ կոնֆերանսին մասնակցելու համար հրավիրատոմսեր են ուղարկվել աշխարհի տարբեր երկրների արտամարմնային բեղմնավորման մանսգետներին:
Գեորգի Օկոևը նշում է, որ կոնֆերանսի ընթացքում քննրակվելու են արտամարմնային բեղմնավորման խնդիրներն ու դժվարությունները:
«Դրա շնորհիվ կհանդիպենք արտասահմանցի մեր գործընկերների հետ և կիրականացվի փորձի փոխանակում»,- նշեց պրն Օկոևը:
Կոնֆերանսի համանախագահներն են Ֆրանսիայի վերածնության կենտրոնի տնօրեն Ժան Պիեռ Ֆրանկելբալմը և Գեորգի Օկոևը:
MEDINFORM 22.04.2005


ՄԱԿ-ի գլխավոր ասամբլեայի իրավաբանական կոմիտեն օրերս ընդունել է մի փաստաթուղթ, որով ՄԱԿ-ի անդամ երկրներին կոչ է արվում արգելել կլոնավորումը: Ընդ որում, ըստ փաստաթղթի, արգելվում է ոչ միայն մարդկանց, այլ կենդանիների և օրգանների կլոնավորումը: «Mednovosti.Ru»-ի հաղորդմամբ փաստաթուղթն ընդունվել է 77 կողմ, 35 դեմ և 43 ձեռնպահ ձայներով: «Reuters» գործակալությունը տեղեկացրել է, որ կլոնավորման արգելքի ջատագով է հանդիսանում ԱՄՆ-ը:
Նշենք, որ կլոնվորման հարցը արդեն մի քանի տարի է՝ քննարկվում է աշխարհի գիտնականների և բժիշկների կողմից: Մանսագետների կարծիքով կլոնավորման շնորհիվ հնարավոր կլինի կանխել ժառանգաբար փոխանցվող հիվանդությունները: Մյուս կողմից մասնագետները գտնում են, որ կլոնավորմը «թանկ հաճույք» է և ոչ բոլոր պետությունները կարող են իրականացնել այն:
Վերոնշյալ փաստաթուղթը կընդունվի և կլոնավումը ՄԱԿ-ի անդամ երկրներում կարգելվի, եթե 191 երկրների մեծ մասն ընդունեն այն:
Հայաստանի մասնագետները նույնպես նշված հարցի վերաբերյալ տարբեր կարծիքներ են արտահայտում: Մոր և մանկան առողջության պահպանման գիտահետազոտական կենտրոնի (Research Center of maternal and child health protection) տնօրեն Գեորգի Օկոևը նշում է, որ կլոնավորման շնորհիվ բժշկությունը զարգացում կապրի: Նա նույնպես համամիտ է, որ դրա շնորհիվ հնարավորություն կընձեռնվի խուսափել ժառանգաբար փոխանցվող հիվանդություններից:
Սակայն Օկոևը նաև տեղեկացնում է, որ բնական ճանապարհով ծնված երեխան ծնողներից վերցնում է գենետիկական կոդավորված ինֆորմացիան, ուստի ծնողներից մեկ աստիճան զարգացած է լինում: Իսկ կլոնավորման դեպքում այդ զարգացումը տեղի չի ունենում՝ մարդը գենետիկական կոդավորված ինֆորմացիան ստանում է իր կլոնից: «Եթե ունենանք ֆինանսավորում և  համապատասխան օրենքներ, կզբաղվենք կլոնավորման հարցերով»,- նշում է Գեորգի Օկոևը և հավելում, որ Հայաստանն առայժմ կողմ կարտահայտվի ՄԱԿ-ի ընդունած փաստաթղթին:
MEDINFORM 19.04.2005

 

2005-ի ապրիլի 7-ը Առողջապահության համաշխարհային կազմակերպության (ԱՀԿ) (WHO) կողմից «Յուրաքանչյուր մայր, յուրաքանչյուր երեխա ուշադրության կենտրոնում» կարգախոսո